Ísland alla leið

Námið hefst 7. janúar 2027

Skráningarfrestur til 15. september 2026.

Leiðsögunámið Ísland alla leið er sniðið að þeim sem vilja búa sig undir starf leiðsögumanns á Íslandi. Námið okkar hefur verið vottað af BSÍ á Íslandi þess efnis að námið standist kröfur ÍST EN 15565:2008 – evrópsks gæðastaðals um hæfni leiðsögumanna og uppbyggingu þjálfunar- og réttindanáms í ferðaleiðsögn.

Leiðsögn erlendra ferðamanna hefur verið kennd við Símenntun Háskólans á Akureyri frá 2008.

Verklegur hluti námsins er í samstarfi við SBA-Norðurleið.

Meginmarkmið leiðsögunámsins

Meginmarkmið leiðsögunámsins er að nemendur öðlist staðgóða þekkingu og færni til að geta sinnt starfi leiðsögumanns af fagmennsku og í samræmi við Evrópustaðalinn ÍST EN 15565:2008.

Að námi loknu á nemandi að:

• Hafa tileinkað sér lykilfærni leiðsögumanns í samskiptum við ferðamenn og ferðaþjónustuaðila.
• Hafa skilning á þörfum fólks af ólíkum uppruna og geti mætt þörfum þess.
• Þekkja sérstöðu Íslands hvað varðar náttúru, sögu og menningu og vera fær um að miðla viðeigandi upplýsingum til ferðamanna þannig að upplifun þeirra verði jákvæð en raunhæf.
• Búa yfir víðtækri þekkingu á helstu ferðamannastöðum og leiðum og vita hvaða afþreying og þjónusta er í boði á hverjum stað.
• Geta aflað gagna fyrir fjölbreyttar ferðir með ólíka hópa ferðamanna um landið ásamt því að veita áreiðanlegar upplýsingar hverju sinni.
• Vera meðvitaður um helstu skipulagsþætti ferða, geta lagt mat á ferðagögn og mótað ferðir með leiðsögn um landið í samræmi við væntingar vinnuveitanda og gesta.
• Búa yfir fullnægjandi orðaforða og kunnáttu í því tungumáli sem leiðsagt er á.
• Vera meðvitaður um mikilvægi þess að fylgja ætíð settum öryggisreglum og vera til fyrirmyndar þegar kemur að umgengni við náttúruna, náttúruvernd og sjálfbærni.
• Hafa skilning á eðli ferðaþjónustunnar sem atvinnugrein, mikilvægi hennar og umfangi.
• Þekkja lög og reglugerðir sem tengjast störfum leiðsögumanna.

Einstaklingar sem hafa lokið námi í ferðamálafræðum og vilja bæta við sig leiðsögunámi geta sótt um að fá sambærilega áfanga metna inn í námið. Einnig geta eldri leiðsögumenn sótt um að sækja einstaka áfanga.

Leiðsögumenn sem starfa á Íslandi skulu hafa menntun í skyndihjálp og björgun í samræmi við gæðaviðmið SAF og leiðbeinandi reglur Ferðamálastofu um öryggismál. Til að útskrifast þurfa nemendur að hafa lokið 20 klukkustunda námskeiði í skyndihjálp/fyrstu hjálp. Nemendur þurfa að greiða fyrir það námskeið aukalega en á vormisseri 2028 mun Símenntun HA halda námskeið sem uppfyllir þær kröfur.

Nemendur sem útskrifast sem leiðsögumenn geta sótt um félagsaðild að Leiðsögn - stéttarfélagi leiðsögumanna.

Námið spannar þrjár annir; vor 2027, haust 2027 og vor 2028.

• Námið er að stórum hluta fjarnám og spannar þrjár annir. Það er skipulagt þannig að mögulegt er að sinna því samhliða starfi og búa hvar sem er á landinu. Umfang námsins er 700-900 klukkustundir.
• Á hverri önn verða þrjár staðlotur á Akureyri sem nemendur eiga að mæta í, oftast frá fimmtudegi til sunnudags. Skyldumæting er í staðlotur.
• Fyrirlestrar eru teknir upp og verða aðgengilegir nemendum í kennsluvef námsins, hægt er að hlusta á þá hvenær sem er á meðan náminu stendur.
• Af og til má reikna með fjarkennslu í rauntíma.
• Vettvangs- og æfingaferðir eru skipulagðar yfir námstímann og endar námið á sex daga ferð um landið. Gert er ráð fyrir 100% þátttöku í þessum ferðum.
• Kennsla í leiðsögunáminu fer fram á íslensku.
• Nemendur eru þjálfaðir í framsetningu efnis á ensku og/eða þýsku en ekki er um eiginlega tungumálakennslu að ræða.
• Námið er aðlagað að nemendum sem eru að læra íslensku, hægt er að skila verkefnum og prófum á ensku.

Námið hefst með staðlotu fimmtudaginn 7. janúar 2027. Aðrar staðlotur á fyrstu önn eru áætlaðar 4. - 7. mars og 6. - 9. maí. Önnur önn hefst seinni hluta ágústmánaðar 2027 og lýkur í byrjun desember. Þriðja önn hefst í byrjun janúar 2028 og lýkur í byrjun maí 2028 og verður útskrift í enda maí 2028 á Akureyri. Sumarið 2027 þurfa nemendur að reikna með að verja 3-5 dögum í verkefnavinnu og kynnisferðir.

Hægt er að nálgast kennsluskrá námsins hér. 

Í kennsluskrá eru nánari upplýsingar um einstök námskeið og hvenær þau eru kennd.

• Tuttugu ára aldurstakmark.
• Stúdentspróf, sambærileg menntun eða raunfærnimat.
• Gott vald á íslensku.
• Standast inntökupróf í því tungumáli sem umsækjandi hyggst nota í leiðsögn og skólinn getur boðið upp á þjálfun í.

Inntökupróf í erlendum tungumálum (ensku og þýsku) verða haustið 2026. Inntökupróf er innifalið í staðfestingargjaldi. Nánari tímasetning er auglýst síðar.

Kennslutilhögun

Námið skiptist á þrjár annir og er skipulagt þannig að hægt sé að sinna því samhliða starfi og óháð búsetu. Á hverri önn eru þrjár staðlotur en þess á milli stunda nemendur nám í gegnum Canvas kennsluvef skólans. Fyrirlestrar og annað kennsluefni verður aðgengilegt á kennsluvefnum og munu fyrirlestrar birtast nemendum þar á mánudögum og þriðjudögum. Að auki munu kennarar í einstökum námskeiðum boða til fjarfunda með nemendum.

Skyldumæting er í staðlotur á Akureyri sem eru alla jafnan frá hádegi á fimmtudegi til seinni parts á sunnudegi en þá er m.a. farið í æfingaferðir. Sömuleiðis verða allir nemendur að taka þátt í hringferð um landið í lok vorannar 2028.

Kennsla fer fram á íslensku en hægt er að skila verkefnum og prófum á ensku eða þýsku fyrir þau sem eru að læra íslensku.

Til að útskrifast þurfa nemendur að hafa lokið 20 klukkustunda námskeiði í skyndihjálp/fyrstu hjálp. Símenntun HA mun standa fyrir slíku námskeiði á vorönn 2028 en nemendur þurfa að greiða sjálfir fyrir það.

Verkefnastjórar námsins
 

Ingibjörg Elín Jónasdóttir

Margrét Kristín Jónsdóttir

Fagráð og umsjón með námi

• Margrét K. Jónsdóttir, fagleg umsjón
• Ingibjörg Elín Jónasdóttir, fagleg umsjón
• Guðrún Þóra Gunnarsdóttir forstöðumaður Rannsóknarmiðstöðvar ferðamála
• Elías Bj. Gíslason sérfræðingur í þróun og þjónustu hjá Ferðamálastofu
• Stefán Guðnason, forstöðumaður Símenntunar Háskólans á Akureyri

Kennarar

Fjölmargir kennarar og fyrirlesarar koma að náminu, hver og einn sérfræðingur á viðkomandi sviði.

Námið spannar þrjár annir, frá upphafi árs 2027 til vors 2028.

Heildarverð námsins er kr. 850.000, þar af er óafturkræft staðfestingargjald kr. 75.000, inntökupróf er innifalið í staðfestingargjaldi. Nemendur greiða sjálf fæði í öllum ferðum svo og gistingu í hringferð um landið. Námsgögn, utan efnis frá kennurum, eru ekki innifalin í skólagjöldum.

Verð fyrir viðbótar inntökupróf í öðru tungumáli er 15.000 kr. Verð fyrir auka- og endurtökupróf er 15.000 kr.

Skipta má greiðslum í þrennt fyrir upphaf náms án auka kostnaðar. 

Ekki er hægt að krefjast endurgreiðslu ef nemandi ákveður að hætta í námi á námstíma.

Styrkir:

SBA-Norðurleið styrkir námið með því að leggja til rútu og bílstjóra í æfinga- og vettvangsferðir. 
Vakin er athygli á að ýmis stéttarfélög og vinnuveitendur veita góða námsstyrki. Einnig er vakin athygli á að hjá Vinnumálastofnun eru upplýsingar og ráðgjöf varðandi margvísleg námsúrræði fyrir einstaklinga í atvinnuleit.

Skráning:

Við skráningu í námið hér á síðunni hefst ferlið, í framhaldinu fær viðkomandi tölvupóst frá SMHA þar sem óskað er eftir stuttu yfirliti yfir náms- og starfsferil. ATHUGIÐ að skrá “greiðsluseðill” í greiðsluleið við skráningu til þess að greiða ekki strax fyrir allt námið fyrir þau sem vilja dreifa greiðslum.

Ég var í hópi þeirra nemenda sem luku í vor fyrsta leiðsögunáminu frá Símenntun Háskólans á Akureyri sem kennt var sem fjarnám með staðlotum. Það hentaði mér mjög vel að geta horft á fyrirlestrana þegar mér hentaði og síðan voru staðloturnar ákaflega skemmtilegar og lærdómsríkar. Þar fékk maður tækifæri til að kynnast samnemendum og kennurum og einnig var farið í kynnisferðir og dagsferðir á helstu ferðamannastaði í nágrenninu. Toppurinn var síðan hringferðin okkar um landið. Ég held að öll kunnum við enn betur að meta fallega landið okkar og höfum uppgötvað staði sem við þekktum ekki og enn fleiri sem okkur langar að kynnast. Námið var yfirgripsmikið og vakti áhuga minn á fuglum, blómum, kirkjum og jarðfræði svo eitthvað sé nefnt og það kom mér á óvart hvað mér fannst námsefnið allt skemmtilegt. Námið hefur opnað ýmsar dyr til að starfa sem leiðsögumaður. Eftir fyrstu önnina, í fyrrasumar, starfaði ég hjá SBA og ég hlakka til að halda áfram á þeirri braut hvort sem það verður sem leiðsögumaður í rútu eða ökuleiðsögumaður. - Marta Einarsdóttir