Glæsilegur árangur nemenda í D-vottunarprófi

Á dögunum lauk hópur nemenda námi í námskeiðinu Verkefnastjórnun með vottun hjá Símenntun Háskólans á Akureyri. Námskeiðið hefur það markmið að veita þátttakendum trausta undirstöðu í verkefnastjórnun, bæði fræðilega og hagnýta. Í lok námskeiðsins gengust nemendur undir D-vottunarpróf sem veitir alþjóðlega vottun í samræmi við staðla IPMA – International Project Management Association.

D-vottunin er viðurkennd alþjóðlega og staðfestir hæfni til að stjórna minni og meðalstórum verkefnum á faglegan hátt. Slík vottun er mikilvægur áfangi fyrir þá sem vilja þróa sig í starfi eða styrkja stöðu sína á vinnumarkaði. Vottunin er í umsjón Verkefnastjórnunarfélags Íslands (VSF), sem hefur umsjón með vottunarstarfi hér á landi í samræmi við alþjóðleg viðmið. Á heimasíðu VSF (www.vsf.is) kemur fram að vottun „styrki bæði einstaklinga og atvinnulíf með markvissari verkefnastjórnun og bættri árangursstýringu.“

Námskeiðið er 12 vikur og hefst næst 9. september 2025. Mikil ánægja hefur verið með námskeiðið sem er allt kennt í fjarnámi og hentar því fólki hvar sem er af landinu. Skráning er hafin!

Við óskum öllum útskriftarnemendum hjartanlega til hamingju með áfangann og hlökkum til að fylgjast með þeim nýta þekkingu sína og hæfni í framtíðarverkefnum – bæði innanlands og á alþjóðlegum vettvangi.