Framtíðin er græn – þrír frá SMHA ljúka MBA í endurnýjanlegri orku
Þrír nemendur frá SMHA luku nýverið MBA-námi í endurnýjanlegri orku (Renewable Energy) við University of the Highlands and Islands (UHI) í Skotlandi. Námið er hluti af samstarfi SMHA og UHI og hefur vakið athygli fyrir að sameina hefðbundna stjórnunar- og rekstrarþekkingu við sérhæfða menntun í sjálfbærni og orkumálum framtíðarinnar.
MBA-námið hjá UHI er sveigjanlegt og hentar sérstaklega vel fólki í fullri vinnu. Kennslan fer fram að öllu leyti í fjarnámi og byggir á sjálfsnámi, verkefnavinnu og samræðu við leiðbeinendur og samnemendur. Þessi sveigjanleiki gerir nemendum kleift að samræma námið við vinnu og fjölskyldulíf — án þess að fórna gæðum eða dýpt.
Ein af áherslum námsins er að undirbúa stjórnendur og sérfræðinga til að leiða umbreytingu í átt að sjálfbærum lausnum og grænni framtíð. Þar sameinast hagnýt rekstrarfærni, stefnumótun og leiðtogahæfni við dýpri skilning á loftslagsmálum og nýrri tækni á sviði endurnýjanlegrar orku.
Útskriftin fór fram 2. október í Perth Skotlandi og var mikið um dýrðir eins og sjá má á myndum hér fyrir neðan.
Á myndinni hér til hægri má sjá þá Guðmund Finnbogason, Elvar Magnússon og Tómas Pétur Sigursteinsson við útskriftarathöfnina. Þeir hófu allir nám á sama tíma, tóku fullt nám með fullri vinnu og voru allir skráðir á sömu línuna innan MBA námsins, Renewable Energy. Það var einstaklega skemmtilegt að sjá þá útskrifast saman núna 2. október.
Elvar Magnússon, nýútskrifaður nemandi lýsir reynslu sinni svo:
"Ég stundaði MBA-námið í UHI samhliða fullri vinnu, sem reyndist bæði krefjandi og ótrúlega gefandi á sama tíma. Sveigjanleikinn í náminu gerði mér kleift að sinna því þar sem kennslan byggðist á sjálfsnámi og verkefna skilum, þannig gat ég stjórnað tímanum eftir eigin höfði og samræmt námið við vinnu og fjölskyldulífi. Útskriftin í Skotlandi var virkilega eftirminnileg upplifun. Það var einstakt að kynnast skoskum hefðum, heyra sekkjapípur og taka þátt í hátíðlegri athöfn. Þetta hefur verið ótrúlegt ferðalag og ég er bæði stoltur og þakklátur fyrir að hafa lokið náminu. Það efldi mig ekki aðeins faglega, heldur líka persónulega – sérstaklega í þrautseigju og sjálfstrausti. Ég hlakka til að nýta þessa reynslu áfram í starfi og framtíðarverkefnum."
SMHA óskar útskriftarnemunum innilega til hamingju með áfangann og hlakkar til að fylgjast með framlagi þeirra til grænnar framtíðar – bæði á Íslandi og erlendis.
👉 Nú er opið fyrir umsóknir í næsta MBA-nám, sem hefst í janúar 2026.
Námið býður upp á fimm mismunandi línur:
- Aviation
- Environment
- Executive
- Renewable Energy
- Resilience
Allt nánar um námið, uppsetningu, verð og áfanga má finna hér: https://smha.is/namskeid/mba-nam-simenntunarha-og-uhi/
